عشقِ احمد مِری رگ رگ میں رواں ہوتا ہے | نعت شریف

عشقِ احمد مِری رگ رگ میں رواں ہوتا ہے
ذِکر سے ان  کے مِرا درد نِہاں ہوتا ہے

نغمہ خوانو! شہہِ ابرار کی نعتیں پڑھ لو
ان سے شاداب دِل و جاں کا جہاں ہوتا ہے

ظُلمتیں مِٹ گئیں اِک نُور سا چھایا ہر سو
وہ جہاں جائیں وہاں امن و اٙماں ہوتا ہے

دِل کے کانو！ہمہ تن گُوش رہو مجلس میں
سیرتِ والدِ زہراؓ کا بیاں ہوتا ہے

نعت لکھنے کے لیے عشقِ نبیؐ دل میں ہو
ورنہ لفظوں میں فقط سوز کہاں ہوتا ہے؟

نعت کہنا ہی سعادت ہے سخن گوئی میں
محفلِ نعت میں جنت کا سماں ہوتا ہے

دل میں اب یادِ محمدؐ ہے بسی کچھ ایسے
ہرگھڑی صلِ علی وردِ زُباں ہوتا ہے

اُنؐ کی صحبت کی سعادت مِری قسمت بن جائے
جِن کے کردار سے اسلام عیاں ہوتا ہے

آبِ کوثر مِرے سرکارؐ پلائیں مُجھ کو
دل مِرا رب سے یہ فریاد کُناں ہوتا ہے

جس کے سینے میں ہو امت کی محبت اذلان
وہ بڑھاپے میں بھی بھرپور جواں ہوتا ہے

عشقِ احمد مِری رگ رگ میں رواں ہوتا ہے
ذِکر سے ان  کے مِرا درد نِہاں ہوتا ہے

شاعری:  اذلان الرحمان

اگر آپ مزید مناجات، حمدیہ اشعار، نعت شریف یا  شان صحابہ پر کلام پڑھنا چاہتے ہیں تو یہ لازمی دیکھیں

اے نبی پیارے نبی پیارے نبی پیارے نبی |نعت شریف