دین کی راہوں میں قربانی نہیں ہے رائیگاں | ابراہیم علیہ السلام

دین کی راہوں میں قربانی نہیں ہے رائیگاں
چاہتے ہو جنتیں تو وار دو یہ جسم و جاں

صرف عقبی ہی نہیں دنیا میں بھی عزت ملے
دیکھ لو میرے خلیل اللہ کی قربانیاں

میرے ابراہیم کا ایمان گر پیدا کرو
آتشِ نمرود بھی بن جائے گی اک گلستاں

آیا رب کا حکم جب تو اک پیاسے دشت میں
چھوڑا بیوی بچوں کو دے کر بس اک رب کی اماں

تم کرو قربان چاہت رب کی چاہت کے لیے
پاو گے اپنے لیے تم رب کی چاہت کا جہاں

رب کی مرضی پر وہ راضی ام اسماعیل تھیں
پاس تھا ان کے اگر کچھ تو فقط نورِ ایماں

چھت نہ تھی پانی نہ تھا وحشی درندے چار سو
نہ ڈرا پائیں انہیں اس دشت کی تاریکیاں

نہ ہی دکھ تھا باپ کو، بیٹے کو بھی حیرت نہ تھی
حکم قربانی جو پہنچا کر دی حاضر اپنی جاں

عرش والے نے دلوں کی نیتیں سب جان لیں
تاابد قربانی کی سنت ہوئی پھر جاوداں

اپنے ہاتھوں سے بنایا تھا جنہوں نے رب کا گھر
رب نے ان کے کر دئیے محفوظ قدموں کے نشاں

ان کا اسوہ ہے ہر اک امت کے آگے معتبر
میرے جدالانبیا کی دلنشیں ہے داستاں

حکم ربی پر نہ رک پائے کبھی ان کے قدم
معتبر تاابد ٹھہرا ان کا ہر نام و نشاں

کر دو قرباں یہ عمر یہ خون اور یہ مال و جاں
ان ہی راہوں میں چھپی ہے عظمتوں کی کہکشاں

دین کی راہوں میں قربانی نہیں ہے رائیگاں
چاہتے ہو جنتیں تو وار دو یہ جسم و جاں

شاعری :سلیم اللہ صفدر

اگر آپ حضرت ابراہیم علیہ السلام کی زندگی اور ان کی قربانیوں کے متعلق مزید پڑھنا چاہتے ہیں تو یہ لازمی دیکھیں