نبھاتے ہیں جو ساتھ مشکل گھڑی میں | اداس اردو شاعری
urdu poetry ghazal | urdu poetry sad 2 lines
نبھاتے ہیں جو ساتھ مشکل گھڑی میں
بشر ایسے کم ہیں مری زندگی میں
سکوں جن کو ملتا نہیں خسروی میں
وہ کرتے ہیں مسکن کہیں جھونپڑی میں
کوئی راستہ اب دکھا میرے مرشد
گنوایا ہے عقبٰی تری پیروی میں
میں پانی نہ مانگوں کبھی کوفیوں سے
بھلے جان جائے مِری تشنگی میں
سدا فاقہ مستی کا عالم رہا ہے
کیا ہے گزارا فقط گودڑی میں
جو سُر گھولتی ہیں سمندر کی لہریں
نہیں ساز ایسا کسی بانسری میں
دباتے رہے جو ہماری صدائیں
وہی لوگ مارے گئے خامشی میں
میں کرتا رہوں خدمتِ خلق ہر دم
کٹے زندگانی اِسی نوکری میں
نبھاتے ہیں جو ساتھ مشکل گھڑی میں
بشر ایسے کم ہیں مری زندگی میں
شاعری : بابر علی برق
