امت مسلمہ کی بقا اتحاد میں ہے

کسی نے مجھے مسلک سے غداری کا سرٹیفیکیٹ تھمایا۔ کسی نے تاریخ پر حملے شروع کر دئیے۔ کسی نے ملکی پالیسی بیان کی۔ اور کسی نے یہاں تک کہہ دیا کہ جو اپنے نظر آتے ہیں سب سے زیادہ مخالفت یہی کرتے ہیں۔ اس لیے اپنی صفوں میں موجود مخالف سے لڑنا پہلے ضروری ہے اعلانیہ دشمن سے لڑنا بعد میں. (دشمن سے پہلے غدار کا سرقلم کرو. صلاح الدین ایوبی ). حالانکہ غدار تو وہ ہوتا ہے جو منہ پر میٹھا ہو اور پینٹھ پیچھے وار کرے… جو آپ کے درمیان موجود ہو کر مخالفت کر رہا ہے وہ غدار نہیں۔ اور اس کا سرقلم نہیں کیا جاتا بلکہ اس کے ساتھ ڈیلنگ کی جاتی ہے.

لیکن مجھے معلوم تھا امت مسلمہ کی بقا اتحاد میں ہے اور چند مشترکات پر اتحاد کر لینے سے نہ کوئی کاپر ہو جاتا ہے اور نہ کوئی غدار. لڑنے والے یزید کے نام پر، لارنس آف عریبہ پر، بھٹو، مجیب اور نیازی کے نام پر لڑتے رہے اور میرے جیسا نقار خانے میں طوطی جتنی آواز رکھنے والا بندہ چیختا رہا کہ اور موضوعات بہت ہیں ان پر آپس میں لڑ لینا لیکن بعد میں. پہلے دشمن سے لڑ لو۔ لیکن کسی نے نہ سنی. جب اور کوئی جواب نہ ملا تو مجھ پر الٹے سیدھے فتوے لگا کر، میری ذات پر حملے شروع کر دئیے گئے.

کچھ سے پبلک میں فیس بک پر بحث کی۔ کچھ سے الگ انباکس واٹس اپ پر بات کی۔ اور پوچھا کہ تمام دینی سیاسی جماعتوں کا دوبارہ متحد ہونے میں کیا قباحت ہے۔ اکثر کا یہی جواب تھا کہ متحدہ مجلس عمل کی ناکامی کے بعد اب دوبارہ اس اتحاد کو کوئی تسلیم نہیں کرے گا. حالانکہ صورت حال جتنی بھی مختلف ہو اتحاد تاریخ میں ہمیشہ مفید رہا ہے. سب جماعتیں غلبہ اسلام کے لیے کوشاں ہیں۔ لیکن سب یہی سمجھتی ہیں کہ ہم حق پر ہیں۔ اور باقی سب چابی والے کھلونے. مزے کی بات یہ کہ دو مختلف جماعتیں دونوں ہی ایک دوسرے کے بارے میں یہی سوچتی ہیں. کہ ہم تو حق کے لیے خود نکلے ہیں اور دوسروں کو لانچ کیا گیا ہے.

لیکن میں نے بھی حوصلہ نہیں چھوڑا. کیوں کہ مجھے معلوم تھا کہ امت مسلمہ کی بقا اور ارتقاء اتحاد میں ہے. ایک دوسرے کا رد کرنے کے نام پر ایک دوسرے کے کپڑے اتارنے میں نہیں. اور الحمد للہ آج بہت سارے احباب کو یہ بات سمجھ آ رہی ہے. کہ سوشل میڈیا ہی نہیں عالمی یا ملکی سطح پر مشترکات پر اتحاد کیا جا سکتا ہے اور ایک دوسرے کو کافر منکر مشرک غدار کہنے والی روش سے بچ کر کسی نہ کسی حد تک اعتماد کر کے مشترکہ دشمن کے خلاف کھڑا ہوا جا سکتا ہے. ہر موقع پر غدار غدار کی رٹ اچھی نہیں ہوتی.

اور کسی اپنے کی برائی سرعام بیان کرنا، پاگل عوام کے سامنے بیان کرنا بھی ضروری نہیں ہوتا. ایک دوسرے کا پردہ رکھنا، بھرم رکھنا، اس کے جذبات و کیفیات کو سمجھ کر اس کے مطابق ردعمل دینا بھی اسلام نے ہی سکھایا لیکن کتنی عجیب بات تھی کہ سب مذہبی جماعتیں آپس میں اتحاد کرنے کی بجائے کسی نہ کسی لبرل کی گود میں بیٹھی ہوئی ہیں یا یوں کہہ لیں کہ ہر لبرل سیاسی جماعت نے اپنے ساتھ ایک ایک مولوی رکھا ہوا ہے.

مجھے اپنی عقل پر کوئی ناز نہیں کیوں کہ یہ سب کچھ میں نے عشروں پہلے انہی سے ہی سیکھا جب مولانا سمیع الحق صاحب، جنرل حمید گل اور حافظ محمد سعید صاحب نے ملکر دفاع پاکستان کونسل کی بنیاد رکھی تھی. کچھ حادثے ہوئے، شہادتیں ہوئیں اتحاد برقرار نہ رہا لیکن اس کا یہ مطلب ہرگز نہیں تھا کہ اتحاد دوبارہ ہو نہیں سکتا یا یہ کہ اگر اتحاد کر لیا تو افسانوں میں ڈھل جائیں گے. الحمداللہ کوئی کسی کو اس کے دین سے نہیں پھیر سکتا.

اور اللہ کا دین اتنا مشکل بھی نہیں کہ کلمہ پڑھنے والے، نبی کی شان بیان کرنے والے، صحابہ کرام کی تعریف بیان کرنے والے کے ساتھ بیٹھنے بات کرنے کھانے پینے کے نتیجے میں اسلام خطرے میں آ جائے یا یہ کہ جب تک ان کا رد نہ کیا جائے تب تک توحید دل میں نہیں اتر سکتی. بھائی رد کرو دل میں کرو الگ کر لو… لیکن یہ کس نے کہا کہ ایک دوسرے کے منہ پر اعلانیہ کفر و شرک, غداری اور بغاوت کے فتوے لگاؤ.

اللہ رب العزت تمام مسلمانوں کا حامی و ناصر ہو. اپنی تو بس یہی خواہش اور یقین ہے کہ

چین و عرب ہمارا، ہندوستاں ہمارا

مسلم ہیں ہم وطن ہے، سارا جہاں ہمارا

توحید کی امانت سینوں میں ہے ہمارے

آساں نہیں مٹانا نام و نشاں ہمارا