اداس دل جب کبھی ہو میرا
میں اپنے رب کو پکارتا ہوں
سکون پاتا ہوں اپنے دل میں،
مقدر اپنا سنوارتا ہوں
کڑکتی دھوپ اور تپتے صحرا
زبان خشک اور سراب لہجے
عبادتوں کے شجر کی نیچے
سکوں گی گھڑیاں گزارتا ہوں
خزاں کی زد میں ہے دل کا آنگن
نہیں ہے امیدِ ابرِ تازہ
بہارِ قرآں سے روح و جاں کی
ہر اک روش کو نکھارتا ہوں
اگر ہو رحمت کا ایک دھارا
تو میں بھی پا لوں کوئی کنارہ
فریبِ شیطان میں گھری ہے
جو دل کی کشتی سنبھالتا ہوں
گناہ کرتا ہوں جب کوئی تو
سکون کی چھاؤں اجاڑتا ہوں
سکونِ دل کی تلاش میں پھر
گناہ کی خواہش کو مارتا ہوں
نہ کان دھرتا ہوں وسوسوں پہ
نہ ڈگمگاتا ہوں راستوں پر
یقین کو روح و جاں میں بھر کر
فریب دل سے نکالتا ہوں
مجھے عطا ہو رضائے ربی
ہر ایک پل جستجو ہے میری
اسی لیے اپنے دل میں صفدر
میں رب کی چاہت ابھارتا ہوں
اداس دل جب کبھی ہو میرا
میں اپنے رب کو پکارتا ہوں
سکون پاتا ہوں اپنے دل میں،
مقدر اپنا سنوارتا ہوں
شاعری : سلیم اللہ صفدر
اگر آپ مزید اداس شاعری پڑھنا چاہتے ہیں تو یہ لازمی دیکھیں
alone sad poetry in urdu | alone boy sad poetry in urdu | sad poetry urdu | dua poetry urdu | poetry dua in urdu
